დაგეგმეთ ყოველწლიური პროფილაქტიკური გამოკვლევა – ყოველწლიურად გამოკვლევაზე მისვლით აკვირდებით თქვენი ჯანმრთელობის მდგომარეობას, რაც გაძლევთ იმის საშუალებას, რომ დინამიკაში დაინახოთ ცვლილებები და სამედიცინო სფეროს წარმომადგენელს, ნუტრიციოლოგსა და სხვა პროფესიონალებს ამ კვლევებზე დაყრდნობით ესაუბროთ. ჯანმრთელობის დაზღვევით შეგიძლიათ უდარდელად იზრუნოთ თქვენს ჯანმრთელობაზე, რადგან ის ყოველწლიურ პროფილაქტიკურ კვლევებს 100%-ით ფარავს.

აირჩიეთ პროვაიდერი კლინიკა, რომელთანაც თავს კომფორტულად გრძნობთ – მნიშვნელოვანია, რომ თავს კომფორტულად გრძნობდეთ იმ ადგილას, რომელსაც თქვენს ჯანმრთელობას ანდობთ. დარწმუნდით, რომ ეს ის ადგილია, რომელსაც ენდობით და თავს კომფორტულად გრძნობთ, რომ შეძლოთ თქვენთვის ყველაზე პირად და მნიშვნელოვან – ჯანმრთელობის საკითხებზე საუბარი.

არ გამოტოვოთ სკრინინგები – სკრინინგების ჩატარება ძალიან მნიშვნელოვანია დაავადებების დროული აღმოჩენისთვის. გაითვალისწინეთ, რომ 30-იან წლებში რამდენიმე მნიშვნელოვანი სკრინინგი უნდა ჩაიტაროთ: ქალებისთვის – პაპ-ტესტი და/ან HPV ტესტი საშვილოსნოს ყელის კიბოს შესამოწმებლად. მამაკაცებისთვის – სათესლე ჯირკვლების ტესტი სათესლე ჯირკვლის კიბოს შესამოწმებლად.

იყავით ფიზიკურად აქტიური – რეკომენდაციაა კვირაში 150 წუთი ვარჯიში – წონის აწევისა და კარდიოს კომბინაციით. თითოეული ფიზიკური აქტივობას განსხვავებული სასიკეთო დატვირთვა აქვს თქვენი ჯანმრთელობისთვის. წონებით ვარჯიში სასარგებლოა სახსრების სიჯანსაღის შესანარჩუნებლად, ოსტეოპოროზის პრევენციისთვის. კარდიოვასკულარული ვარჯიში კი დაეხმარება თქვენს გულსა და ფილტვებს გამართულ ფუნქციონირებაში.

თუ განსაკუთრებული ფიზიკური აქტივობით არ გამოირჩევით, ნუ ეცდებით, რომ პირველივე ჯერზე სრული დატვირთვით ივარჯიშოთ, დაიწყეთ მცირე დროით, მსუბუქი ვარჯიშებით. დასაწყისისთვის კვირაში 2-3 დღეც საკმარისია. თუ ფინანსური მდგომარეობა ხელს გიწყობთ, უმჯობესია აიყვანოთ პროფესიონალი ტრენერი, რომელიც შეგირჩევთ თქვენი ჯანმრთელობისა და აღნაგობის შესაბამის ვარჯიშებს.  თუ სპორტ დარბაზში ვარჯიში არ გხიბლავთ, სცადეთ გარეთ სირბილი, ცურვა, იოგა ან სხვა. დატესტეთ სხვადასხვა ფიზიკური აქტივობები და იპოვეთ ის აქტივობა, რომელიც ჯანმრთელობისთვის სარგებლის გარდა, თქვენც სიამოვნებას მოგანიჭებთ და სასიამოვნო დროის გატარების საშუალება იქნება.